“Covid 19ကာလမှာ ကိုယ်ဝန်ဆောင်မိခင်တွေကို ထောက်ပံ့ကြေးပေးဖို့စီစဥ်နေ”

မကွေး သြဂုတ် ၁၄ “Covid 19ကပ်ရောဂါကာလမှာမြန်မာနိုင်ငံအတွင်းရှိ ကိုယ်ဝန်ဆောင်မိခင်တွေကို နိုင်ငံတော်ဘတ်ဂျက်ဖြင့် CERP Planအနေနဲ့ ထောက်ပံ့ကြေးပေးဖို့ စီစဥ်နေတယ်လို့ မကွေးတိုင်းဒေသကြီးလူမှုဝန်ထမ်းဦးစီးဌာနကသိရပါတယ်။ “ကိုယ်ဝန်ဆောင်မိခင်တွေကိုထောက်ပံ့ကြေး ကျပ်၃သောင်းပေးမှာဖြစ်ပြီး လက်ရှိမှာကိုယ်ဝန်ဆောင်မိခင်တွေအနေနဲ့ စာရင်းပေးသွင်းနေရတဲ့အချိန်ဖြစ်ပါတယ်၊ ထောက်ပံ့ကြေးရရှိဖို့အတွက် ငွေဗိုက်အပလီကေးရှင်းကို အသုံးပြုရမှာဖြစ်ပြီး သြဂုတ်လ၁၁ရက်နေ့ကနေ စက်တင်ဘာလ၁၅ရက်နေ့အထိ စာရင်းပေးသွင်းနိုင်ပါတယ်လို့ မကွေးတိုင်းလူမှုဝန်ထမ်းဦးစီးဌာနမှညွှန်ကြားရေးမှူးဒေါ်နန္ဒာနွယ်ဟန်က ပြောပါတယ်။ “မကွေးတိုင်းအတွင်း ကိုယ်ဝန်​ဆောင်မိခင်ဦးရေ ၅သောင်း၈ထောင်ဝန်ကျင်ရှိမယ်လို့ခန့်မှန်းထားကာ ထောက်ပံ့ကြေးရရန် ငွေဗိုက်အပလီကေးရှင်းကို လူအများသိဖို့လိုအပ်ပြီး အပလီကေးရှင်းကို အသုံးမပြုတတ်ပါက လူမှုဝန်ထမ်းရုံးတွေမှာ ကူညီလုပ်​ဆောင်ပေးနေတယ်လို့ ညွှန်ကြားရေးမှူးဒေါ်နန္ဒာနွယ်ဟန်က ဆိုပါတယ်။ “ငွေဗိုက်အပလီကေးရှင်းကို မကွေးတိုင်းဒေသကြီးလူမှုဝန်ထမ်းဦးစီးဌာနရုံး pageမှာ တင်ထားပြီး ဒေါင်းလော့ဆွဲကာ ကိုယ်ဝန်ဆောင်စောင့်ရှောက်မှု မှတ်တမ်း၊ကိုယ်ဝန်ဆောင်မိခင်ဓာတ်ပုံနဲ့ ထောက်ပံ့ကြေးရယူဖို့ ရွေးချယ်ပေးကာစာရင်းသွင်းရတာဖြစ်တယ်လို့ သိရပါတယ်၊ဒါ့အပြင် ဝေးလန်ခေါင်သီတဲ့နေရာတွေမှာ နေထိုင်တဲ့ကိုယ်ဝန်ဆောင်မိခင်တွေ ပါခဲ့ရင်လည်း တခြားဌာနတွေနဲ့ ချိတ်ဆက်ပြီး ထောက်ပံ့ကြေးရအောင် လုပ်​ဆောင်သွားမယ်လို့ သိရပါတယ်။ “ကိုယ်ဝန်ဆောင်မိခင်တွေ မွေးဖွားဖို့အတွက် နိုင်ငံတော်ကထောက်ပံ့တာက အထောက်အကူဖြစ်လို့ ကျေးဇူးတင်မိတယ်လို့ ကိုယ်ဝန်​ဆောင်မိခင်ဒေါ်ထူးထူးဝေကပြောပါတယ်။ “မကွေးတိုင်းတွင် Covid 19ကာလမှာ ၈၅နှစ်နဲ့အထက်သက်ကြီးဘိုးဘွား(၂၀၉၃၂)ဦး၊ ကွာရန်တင်းစင်တာမှာရှိတဲ့ ငါးနှစ်အောက်ကလေး၂၆ဦး၊ကိုယ်ဝန်ဆောင်မိခင်(၁၀၁)ဦးတို့ကို တစ်ဦးလျင် ကျပ်၃သောင်းနှုန်း ထောက်ပံ့ပေးခဲ့ပြီး ဒါ့အပြင် မြစ်ရေဝင်ရောက်ခဲ့တဲ့မြေနုကျွန်းကျေးရွာက ငါးနှစ်အောက်ကလေး(၇၁)ယောက်နဲ့ ကိုယ်ဝန်ဆောင်မိခင်၅ယောက်တို့ကိုလည်း ကျပ်၃သောင်းဆီထောက်ပံ့ပေးခဲ့ကြောင်း၊အဆိုပါထောက်ပံ့မှုတွေဟာ နိုင်ငံတော်ဘတ်ဂျက်နဲ့ ထပ်​ဆောင်းထောက်ပံ့တာဖြစ်တယ်လို့ မကွေးတိုင်းဒေသကြီးလူမှုဝန်ထမ်းဦးစီးဌာနက သိရပါတယ်။ ရွာသား(မကွေး) မကွေးဂျာနယ်