ပို့ကုန်သီးနှံ ပဲစင်းငုံကို လာမည့် စိုက်ပျိုးရာသီတွင် တိုးချဲ့စိုက်ပျိုးသင့်

ရွှေမန်း
အိန္ဒိယနိုင်ငံ၏ ၂၀၂၅ခုနှစ် မတ်လအထိ ဖြေလျော့ထားသည့်ပဲတင်သွင်းမှု မူဝါဒကြောင့် မြန်မာနိုင်ငံစိုက်ပျိုးသသည့် ပဲစင်းငုံမှာ လာမည့်ပဲသစ်ရာသီထိ အကြုံဝင်တာကြောင့် တောင်သူများတိုးချဲ့ စိုက်ပျိုးသင့်သော် ပို့ကုန်သီးနှံတစ်မျိုးဖြစ်လာကြောင်း ပို့ကုန်သမားများက သုံးသပ်ထားသည်။
ပြည်တွင်းမှ ပို့ကုန်ပဲများနှင့် ပြောင်းစိုက်ပျိုးမှုမှာ နှစ်စဉ်သီးနှံပေါက်ဈေးနှင့် ဝယ်လိုအားဈေးကွက်ပေါ်မူတည်ပြီး စိုက်ပျိုးကြသလို ရေမြေရာသီဥတုပေါ်မူတည်ပြီး သီးနှံများပြောင်းလည်စိုက်ပျိုးလေ့ရှိသည်။
ယခင်နှစ်များက ပြောင်းသီးနှံဈေးကွက်ဈေးကောင်းရရှိကြသလို ပို့ကုန်ကောက်ပဲသီးနှံများလည်း ဈေးကောင်းရရှိခဲ့ရာ ယခုနှစ်တွင် ပြောင်းဈေးကွက်မှာ ကမ္ဘာ့ပြောင်းဈေး အနည်းငယ်ကျဆင်းနေခြင်းဖြစ်သည်။ ပို့ကုန်ပဲများမှာ အိန္ဒိယနိုင်ငံ၏ ပဲဝယ်လိုအားနှင့်ပဲတင်သွင်းမှုမူဝါဒအပြောင်းအလဲကြောင့် ပြည်တွင်း မတ်ပဲနှင့် ပဲစင်းငုံမှာ ပြည်တွင်းစံချိန်ပေါက်ဈေးများထိ ရောက်ရှိလာခြင်းဖြစ်သည်။
သို့ဖြစ်၍ လာမည့်ပဲသစ်ပေါ်ချိန်ထိ အိန္ဒိယနိုင်ငံ၏ ပဲဝယ်အားနှင့် ပဲဝယ်ချိန်ကို ချိန်ဆ စိုက်ပျိုးပါက ပဲစင်းငုံမှာ တောင်သူများအတွက် အကျိုးအမြတ်သေချာသည့် စိုက်ပျိုးသီးတစ်မျိုးုဖြစ်လာသည်။
ပဲစင်းငုံမှာ စိုက်ပျိုးကာလ ၆ လခန့်ကြာမြင့်တာကြောင့် တောင်သူများအနေဖြင့် သီးထပ်စိုက်ပျိုးခြင်းများအပြင် စိုက်ပျိုးနိုင်သည့် မြေလွတ်များတွင် တိုးချဲ့ စိုက်ပျိုးရန် အကောင်းဆုံးသီးနှံတစ်မျိုးဖြစ်လာသည်။ ပဲစင်းငုံ သီးနှံကို တို့ချဲ့စိုက်ပျိုးခြင်း အထွက်နှုန်းကောင်းမွန်ကောင်း စနစ်တကျစိုက်ပျိုးခြင်းဖြင့် တောင်သူဝင်ငွေ တိုးသီးနှံဖြစ်သလို ပို့ကုန်ဝင်ငွေ တိုးလာမည့် သီးနှံအမယ်တစ်မျိုးလည်းဖြစ်ကြောင်းသိရသည်။